19/05/2017

Tournai : expressions tournaisiennes (406)

Ete ou n'pos ête, telle est l'questieon d'Edmeond.

J'deos bin vous faire l'aveu, braves gins, qu'in c'momint, no n'amisse Edmeond i-n'va pos treop bin. Ch'est c'que j'ai appris l'sémaine dernière quançque Fifinne elle m'a dit in derrière :

"On a été vir l'docteur pasque cha fait eine paire de jours qu'Edmeond i-n'deonne pos belle, i-m'a fait comprinte que m'n'heomme i-éteot in train d'faire eine crisse existincielle !". 

"Bé ahais, des histoires parelles, ch'est pou les grands infants, pos pou ein vieux qu'i-a presque quater-vingt ans".

"Neon, on dit qu'i-n'a pos d'âche pou vife ein tel malheur, l'docteur pinse qu'i-a eu ein évén'mint déclencheur". 

J'n'ai pos été obligé d'attinte lommint pou avoir l'prouèfe du diagnostic du médecin.

Quançque dins l'salle à minger, je m'sus approché et, comme à l'habitude, j'li ai d'mindé : 

"Et alors, d'puis l'dernière feos que j'sus v'nu à t'maseon, commint qu'te vas Edmeond ? J'sus saisi que te n'es pos sorti alors que déhors i-n'a jamais fait aussi beon".

"A quoi cha sert d'sortir et d'aller s'porméner, après, à s'maseon, i-feaut quand même bin rintrer".

Fifinne elle n'aveot pos tort, cha commincheot très fort !

"Te vas pétête pinser que j'deviens fou mais j'ai asteur des doutes su tout. Pa eximpe, i-a ein meos, dins l'rue des Maux, j'ai croisé l'quémin de m'n'ophtalmo, i-n'm'a pos vu arriver et i-m'a presque cholé. D'eine seul queop, i-s'a ortourné et i-a ainsin berteonné : Mossieu, je n'vous ai pos vu, j'vous prie d'm'escuser. Bé j'd'ai attrapé l'pépète, si m'n'heomme i-est aveule, j'te l'dis tout net, je n'vas pus aller l'consulter pou mes nouvelles neunettes".

"Bah, i-n'feaut pos t'formaliser, des affaires ainsin cha peut alfeos arriver, i-éteot sans doute dins ses pinsées !". 

"T'as sans doute raiseon mais cha fait vingt ans que j'vas à s'maseon et neon seul'mint i-n'm'a pos vu mais pire acore, in m'parlant i-n'm'a même pos orconnu". 

"J'creos qu'avé tout c'qu'on veot à l'télé et qu'on intind à l'radio, ein p'tit peu à l'feos, l'meonte i-d'vient carrémint seot. Prinds ichi, m'visin Idriss (ch'est s'préneom, s'neom i-est treop compliqué), s'garcheon i-voudreot rintrer à les peompiers, bé, i-li a déconseillé, d'puis qu'i-a vu l'Présidint de l'zone de secours parler à No Télé et dire que ch'est pou faire des écolomies d'éthielles que toutes les gasernes ont été orgroupées. I-m'a dit qu'à l'avenir i-n's'ra pos fort sache d'aller vife dins des appartemints situés à l'étache !".

" Mais ce que Polo i-a déclaré, ch'est ein terme financier, on n'va pos ichi ortirer les éthielles des camieons d'peompiers".

"Va toudis espliquer à Idriss, i-habite au sixième étache et i-veut déménager, i-m'a dit qui cacheot après eine maseon d'plat-pied (sic) pou, si i-a l'feu, pouvoir au moinse ête sauvé, ahais, n'ris pos, te m'as compris, éné, Idriss i-n'parle pos fort bin l'français". 

Eine eaute eximpe que l'meonte i-n'tourne pos dreot, ch'est l'attitude, ceulle sémaine, d'Nicolas Hulot. Pou conserver s'liberté d'pinser, intrer in politique i-l'aveot toudis orfusé et l'ov'là asteur dins l'nouvieau gouvernemint comme minisse d'l'invironn'mint, dis hardimint. Comme dit l'garcheon à Bernadette : i-n'pourra pus queurir l' planète, asteur i-va avoir du bouleot, ch'est fini les vacances de Mossieu Hulot. Asteur, i-va devoir s'occuper des éoliennes, des cintrales nucléaires et des panneaux photovoltaïques et surtout convaincre les sceptiques du l'récauff'mint climatique. 

A propeos, te voudreos m'faire aller porméner, bé, te n'as jamais bin ravisé, dins nos rues, avé tous les travéeaux, te veux sans doute que j'cais dins ein tréo. A l'plache Verte, à l'rue du Catieau, à l'rue du Rimpart et à ceulle de l'Epinette, ou bin acore, à l'rue des Jésuites, au quai Noter-Dame, au quai Saint-Brice, à l'avenue d'Maire et à l'Borgnette, te d'vreos savoir qu'on n'sait pus mette ein pied su ein trottoir".

Fifinne elle a rajouté : 

"Au boulevard de Marvis, à l'chaussée d'Bruxelles et au boulevard des Combattants, les tranchées forme'tent ein leong ruban et, pindant c'temps-là, à l'rue des Maux, on a ortiré les pavés qui n'teneot'ent pos !". 

Comme j'vouleos canger ceulle conversatieon, j'ai caché dins l'gazette après eine informatieon. 

"T'as pos invie d'ête bédéeau à l'cathédrale, ov'là ein ouvrache qui n't'ireot pos treop mal.

"Te n'vas pos qu'mincher à faire des queontes d'annochint, te m'veos ichi, à septante-chinq ans acore jeuer au sacristain. Te n'm'as jamais bin vu !".

"Mo Dieu, ch'est bin leon d'jeuer, i-feaut savoir ouvrer" que j'li ai répeondu. 

"Acoute me bin, i-feaut des capacités car l'ouvrache i-est diversifié. I-a d'abord eine missieon d'gardiennache pasque les portes i-feaut les ouvère et les serrer, i-feaut raviser souvint les caméras d'sécurité, i-feaut surveiller sans in avoir l'air, i-feaut porméner alfeos l'nez in l'air... I-a eine missieon d'nettiache pasque les cuifes i-feaut les astiquer, les orfèvreries les faire blinquer, i-feaut rassarcir l'linche et l'nettier, i-feaut toudis bin tout ringer... I-a eine missieon d'accueil des visiteurs, i-feaut leu faire risette et les guider, leu vinte pou l'trésor les billets d'intrée et les bieaux lifes su l'édifice i-t'feaut les écouler... Te deos aussi t'occuper des bougies et des candelles, pou les messes préparer l'autel, arroser les fleurs et mette les horloches à l'heure... i-a les cayères qui feaut ringer et les cloques qui feaut faire seonner. Te f'ras aussi l'garde Suisse dins l'processieon qui traverse l'cathédrale aux grandes occasieons. Comme te l'veos : à Noter-Dame, ête bédéeau, ch'est pos ein ouvrache d'tout erpeos ". 

Comme Edmeond n'a pus dit ein meot, j'sus aller vir Fifinne qui, pindant qu'on parleot, prépareot l'souper à l'cuisine.

"Quançque vous avez été vir l'docteur, i-n'a pos dit quoisque ch'éteot l'élémint déclencheur ?" que j'li ai d'mindé.

"Bé, i-a été faire des examens à l'clinique et s'foie i-orsanne au ceu d'ein alcoolique, du queop, d'puis l'mitan de l'sémaine dernière, i-est privé d'gras, d'vin et d'bière et ov'là pourquoi Edmeond râle, ch'est tout simplemint pasque qu'on l'a mis à l'ieau minérale. Après deux ou treos jours, i-est dev'nu tout paf pa d'vant l'télévisieon et ch'est là qu'i-a décidé de n'pus sortir de la maseon. I-a même dit que si i-n'pouveot pus aller à l'estaminet, i-préféreot s'laicher morir et, à Mulette, ête intiérré. Te m'conneos, pou sauver de l'déprime Edmeond, j'ai caché bin seûr après eine solutieon et ch'est Simone dont l'mari i-éteot toudis quervé qui m'a dit que ch'est de l'bière sans alcool que j'deveos acater".

Edmeond qui nous aveot intindu parler, i-m'a, tout à n'ein queop, appelé :

"Te sais, l'Optimisse, on dit que feaute de grifes on minge des mauviars et bé mi, feaute d'eine bière divine, j'sus bin obligé d'boire de l'bibinne. J'vas pétête postuler pou l'poste d'sacristain ainsin, avant chaque messe, j'vas goûter l'vin!".  

(lexique : ête : être / quançque : lorsque / vir : voir / pasque : parce que / n'pas deonner belle : ne pas aller bien / comprinte : comprendre / parelles : pareilles / neon : non / l'âche : l'âge / vife : vivre / lommint : longtemps / l'prouèfe : la preuve / l'feos : la fois / s'porméner : se promener / commincher (ou qu'mincher) : commencer / pétête : peut-être / asteur : maintenant / l'eximpe : l'exemple / ein meos : un mois / l'quémin (ou le qu'min) : le chemin / choler : bousculer / ein queop : un coup / berteonner : grommeler, murmurer / avoir l'pépète : avoir peur, craindre / ête aveule : être aveugle / les neunettes : les lunettes / ainsin : ainsi / alfeos : parfois / acore : encore / orconnaîte : reconnaître (orconnu au participe passé) / l'meonte : le monde / ichi : ici / l'visin : le voisin / l'garcheon : le garçon / à les : l'expression "à les" est souvent utilisée dans le langage à la place de "aux" / des écolomies : des économies / eine éthielle : une échelle / eine gaserne : une caserne / orgrouper (ou ergrouper) : regrouper / l'étache : l'étage / ortirer (ou ertirer) : retirer / toudis : toujours / cacher après : chercher / ahais : oui / éné : signifie n'est-ce pas, au sein d'une conversation / eaute : autre / ov'là : voilà / ein minisse : un ministre / queurir : courir / l'récauff'mint : le réchauffement / raviser (ou orwettier) : regarder / caire : tomber / ein tréo : un trou / l'plache : la place / l'rue du Catieau : la rue du Château / leong : long / ortirer (ou ertirer) : retirer / canger : changer / ceulle : cette / qu'mincher (ou commincher) : commencer / les queontes : des contes (des histoires) / l'annochint : l'innocent / jeuer : jouer / bin leon : bien loin / ouvrer : travailler / acouter : écouter / l'ouvrache : l'ouvrage, le travail / ouvère : ouvrir / serrer eine porte : fermer une porte / alfeos : parfois / l'nettiache : le nettoyage / les cuifes : les cuivres / astiquer : rendre brillant, faire luire / faire blinquer : faire briller / rassarcir : raccommoder / l'linche : le linge / leu faire risette : leur adresser un sourire / vinte : vendre / les lifes : les livres / les candelles : les chandelles / mette : mettre /les horloches : les horloges / les cayères : les chaises / les cloques : les cloches / erpeos (ou orpeos) : repos / ein meot : un mot / quoisque : qu'est-ce que / orsanner : ressembler / au ceu : à celui / l'mitan : la moitié / l'ieau : l'eau / ête tout paf : être saisi au point de rester rester sans réaction / pa d'vant : devant / s'laicher morir : se laisser mourir / Mulette : nom désignant le cimetière du Sud à Tournai / bin seûr : bien sûr / quervé : ivre / tout à n'ein queop : tout à coup / les grifes : les grives / les mauviars : les merles).

S.T. mai 2017.

14:09 Écrit par l'Optimiste dans Loisirs | Lien permanent | Commentaires (4) | Tags : tournai, patois, picard |

13/05/2017

Tournai : expressions tournaisiennes (405)

Bonne fiête Maman !

Vous avez d'jà ormarqué, mes gins, qu'in Belgique l'fiête des mamères elle cait toudis aux invireons de l'Saint Mamert. Ch'est ein sorte d'pinse-biête pou les ceusses qui n'ont pos d'tiête ! L'fiête, au calinderrier, elle prind toudis plache au momint dusqu'on fiête les saints d'glache

Ave ein bouquet d'fleurs à s'main, eine paire de meots bin queusis, tout in souriant, l'infant rint ainsin hommache à s'maman eine feos par an. 

Pourtant ceulle belle traditieon, elle a du pleomb dins l'aile si on in creot, à l'radio, les dernières nouvelles. 

On va devoir faire bin attintieon pasque l'fiête des mamères in mai et l'ceulle des mopères ein meos pus tard seont asteur menacées : i-d'a qui voudreot'ent même les supprimer !

A Bruxelles, l'directeur d'eine école, après bin des réunieons, i-a décidé que ces fiêtes dins les classes ne s'reot'ent pus préparées. Fini l'pétit bonimint qu'on d'veot réciter, oblié l'pétit cadéeau qu'on alleot leu deonner, pou li, l'fiête des mamères et des mopères, cha n'a plus s'plache dins no nouvelle ère. 

"I-n'feaut surtout pos choquer les ceusses qui, dins no société, n'orprésintent pus, malheureus'mint, eine pétite minorité : les familes décomposées, les gins qui n'ont pos l'même mintalité, les deux parints qui n's'seont pus du sexe opposé... ahais, les temps seont cangés, on deot s'adapter". Ov'là les propeos que j'ai intindu au journal parlé, verdi à siept heures, au momint que j'éteos in train de m'dérévier. Je n'vous dis pos, l'prumière informatieon de l'journée, elle m'a fait beondir, elle m'a scandalisé acore puque quançque m'n'heomme i-a déclaré qu'i-aveot été outré pa les réactieons que les parints d'l'école li aveot'ent adressées. On peut dire que l'albran i-est l'produit vraimint pur d'eine société qui est d'puis lommint ein totale déconfiture ! On vit asteur, mes gins, des momints qui feont pinser à l'chute de l'impire romain. 

Et ch'est pos tout, cha n'fait que commincher, ch'est l'même pou les eautes fiêtes, i-in a qu'on s'déminde vraimint ce qu-i-ont dins leu tiête. Ainsin, eine de no minisses de l'insenn'mint, en c'qui concerne les fiêtes de Pâques et de l'Toussaint, elle a eu eine riche idée, elle veut les mette in déhors des périodes de congés. Comme cha, pus perseonne n's'ra traumatisé pasque l'neom des vacances i-est cangé. Les neommer vacances d'printemps, d'été, d'auteomne et d'hiver, l'paufe feimme elle a seûr'mint trouver l'inspiratieon au feond d'ses verres de bière !

Ch'est ainsin, pou obtenir eine paire de veox in puque aux électieons, les politiciens n's'foutent pos mal d'foute à l'huche les traditieons. 

Au rythme dusqu'on va, j'pinse que dins eine paire d'ainnées, i-faudra pétête fîêter nos parints dins l'pus grand des secrets. Au feond de s'campe, muché sous ses couvertures, l'infant apprindra s'complimint et ch'est à veox basse qu'i-l'dira à s'mamère l'diminche au matin. 

I-d'a qui rintrereont seûr'mint in résistance et sortant d'leu planque, i-ireont canter, à tue-tiête, au mitan du pavé, "les rosses blanques". Cha s'ra considéré comme de l'rébellieon et i-z-ireont tout dreot in priseon. 

J'vous veos v'nir, vous allez dire : l'Optimisse i-fait acore de l'science-fictieon, bé neon, neon, j'veux simplemint attirer l'attintieon. Morcieau pa morcieau, on détruit nos coutumes, on nous taille des nouvieaux costumes, ch'est l'politique du p'tit à p'tit comme cha on n'se rind pos queompte de tout c'qu'on détruit.

Mais tout cha, cha nous éloigne bin leon d'no sujet. Diminche, ch'est l'pus belle des professieons qu'on va fiêter : no mamère, l'feimme qui a souffert pou nous deonner la vie, l'ceulle qui a veillé su nous eautes quançqu'on éteot p'tit, l'ceulle qui nous minque acore des ainnées après que pou l'grand gardin elle est partie.

L'directeur d'école d'Bruxelles i-peut dinser su s'tiête, mais mi, les mamères, j'veux qu'aujord'hui, on les fiête !

Beonne fiête à tertous et pou rappeler l'cancheonne d'Franck Michaël, n'hésitez pos diminche à canter : 

"Toutes, toutes, toutes les mamères seont belles".

(lexique : l'mamère : la mère / caire : tomber / toudis : toujours / ein calinderrier : un calendrier / printe plache : prendre place / dusque : où / l'glache : la glace / des meots bin queusis : des mots bien choisis / rinte : rendre / ainsin : ainsi / ceulle : cette / pasque : parce que / ein meos : un mois / asteur : maintenant / les ceusses : ceux / orprésinter : représenter / ahais : oui / cangé : changé / verdi : vendredi / s'dérévier : s'éveiller / prumière : première / acore puque : encore plus / quançque : lorsque / l'albran : le garnement, le mauvais ouvrier / lommint : longtemps / commincher : commencer / les eautes : les autres / ainsin : ainsi / l'insenn'mint : l'enseignement / eine paire de veox : une paire de voix, ici dans le sens de quelques voix / foute à l'huche : envoyer dehors, par extension ici : envoyer valser / pétête : peut-être / l'campe : la chambre / s'mucher : se cacher / seûr'mint : sûrement / au mitan : au milieu / s'rinte queompte : se rendre compte / bin leon : bien loin / l'cancheonne : la chanson).

S.T. mai 2017.

08:44 Écrit par l'Optimiste dans Loisirs | Lien permanent | Commentaires (0) | Tags : tournai, patois, picard |

05/05/2017

Tournai : expressions tournaisiennes (404)

Les chinquante ainnées d'mariache d'Edmeond et Fifinne.

I-ara chinquante ainnées au meos d'mai qu'Edmeond et Fifinne i-se seont mariés. 

Au début du meos d'avril, Edmeond i-a dit à s'feimme :

"Quoisque te veux que j't'offère pou fiêter ceul anniversaire ?" 

Fifinne n'a pos lommint busié, elle saveot d'jà c'qu'elle alleot li d'minder.

"Edmeond, cha fait asteur d'puis qu'on vit insanne qu'on va tous l'z'ans à La Panne, j'voudreos eine feos canger d'air et aller visiter l'Allemane. Vir l'Forêt Noire ou faire les bords du Rhin, aller in Bavière ou pétête même jusqu'à Berlin, j'pinse qu'on n'peut pos in d'minder puque à nos âches, no conditieon physique n'nous permet pus d'leongs voyaches. D'toutes façeons, j'n'ai pos invie d'm'ortrouver à mitan tout nu su l'sape d'Tahiti, j'n'vais quand même pos aller moutrer aux gins de là-vas m'panche tout à plis. N'oblie pos ce que diseot l'publicité, te t'rappelles, eine vahinée... ch'est gonflé et chez mi tout i-cait". 

Quançqu'i-a intindu prononcer pa s'feimme l'meot Bavière, Edmeond i-a vu pa d'vant ses is danser des chopes de bière.

Dix verres d'ein lite à l'feos, cha vous éteonne, ch'est pourtant l'ordinaire des serveuses teutonnes. 

"T'as raiseon, Fifinne, ch'est l'sud de l'Allemane qu'on va faire, j'voudreos bin découvrir les coutumes de l'Bavière". 

L'lind'main, i-ont fait toutes les aginces du voisinache pou aller querre les programmes des voyaches. 

Fifinne elle a orwettié toute l'étindue du territoire germanique mais Edmeond i-braqueot s'n'ergard uniqu'mint su Munich.

"Ravise, Fifinne, ichi on passe pa l'Luxembourg pou aller orjointe l'ville d'Augsbourg. On reste in Bavière deux jours et puis on s'in va eine pétite sémaine à Salzbourg". 

Les is serrés, in rêvant d'la Bavière, Edmeond sinteot d'jà l'goût de l'bière et in busiant à l'Autriche Fifinne s'veyeot d'jà in Romy Schneider.

Adeon, ov'là l'jour du grand départ arrivé, Fifinne elle a fermé l'porte de l'appartemint à clé. Comme toudis cha n'a pos tardé, on a intindu Edmeond s'mette à berteonner :

"Mais ch'est pos possipe, à m'mote que t'as mis l'mitan de l'garde-rope dins les valisses, ch'est tell'mint lourd que su l'quai Noter-Dame ave l'berdoule des travéaux j'sins que j'm'inlisse".

"Comme on n'sait jamais l'temps qui va faire, j'ai pris des habits d'été et des ceusses d'hiver !".

"On areot quand même pu acater des valisses à roulettes, pou porter ces machins i-feaut ête ein véritape athlète".

"Bé ahais, d'l'Esqueaut à la gare, dins les rues d'Tournai, les roulettes elles areot'ent vite déclaré forfait ! Après tout, ch'n'est pos des biêtes valisses in carteon, elles ont d'jà servi, à m'mamère, in quarante pou l'évacuatieon".

Les ov'là, infin, arrivés pa d'vant l'gare, Edmeond i-aveot l'pépette d'ête in r'tard, i-cacheot après perdu pasqu'i-n'veyeot pos l'car, alors qu'i-n'éteot pourtant qu'six heures moins l'quart.

"Mais n't'in fais pos ainsin, va, i-va arriver, espèce d'innochint, te sais bin qui prind des gins tout l'leong du qu'min".

Quançque l'car i-est arrivé, bin vite, i-ont pris plache, ch'est à c'momint là qu'a vraimint qu'minché l'voyache.

I-rouleot'ent d'puis deux heures et d'mie quançqu'a eu lieu l'prumier arrêt pipi. 

"Mo bé, pou ouvère l'porte i-feaut mette eine pièche dins eine machine, je n'd'ai pos eine seule, te n'sareos m'passer chinquante cents, Fifinne".

"Hureus'mint qu'hier in allant au boulinger, j'ai d'mindé pou avoir de l'monnaie".

Edmeond i-a dit ainsin : 

"Quoisqu'on fait quançqu'on a qu'eine seule pièche pou deux ?".

"Bé, ch'est simpe, i-d'a ein qui deot faire ein noeud !". 

Jusse avant d'sortir, Edmeond i-a vite été boire eine pinte à l'buvette et i-a justifié ceulle incartate à s'feimme en li disant que ch'éteot pou avoir des piéchettes

A Ausbourg, ch'est à l'hôtel "Steigenberger Dreï Morhen" qui seont déquindus, dins l'Maximilianstrasse, ch'est l'neom de l'rue. 

Dins l'campe, au momint d'éteinte l'leumière, Edmeond i-a d'mindé à s'feimme :

"Dis Fifinne, t'a aussi, ein télépheone su t'tape de nuit ?"

"Pourquoi que j'devreos in avoir ein" qu'elle li a dit, "ein su l'tape près d'ti, cha suffit !".

"Milliards, t'est tell'mint leon d'mi que je t'areos téléphoné pindant l'nuit. On n'peut pos dire que cha facilite les rapproch'mints quançqu'on deot dormir dins des lits ainsin". 

"I-veaut mieux cha que d'bourler l'ein su l'eaute in plein mitan et d'ête tout courbatu, l'matin, in s'levant. Comme on dit les voyaches i-forme'tent la jeonesse...".

"Mais i-déforme'tent la vieillesse !".

I-se seont indormis mais i-ont été déréviés à minuit. Les douze queops pa l'cathédrale i-ont été seonnés et Edmeond, faisant ein beond, su l'carpette i-s'a ortrouvé. 

L'lind'main au matin, i-a été à l'hôpital pou s'faire soigner et l'docteur li a mis ein plâtre à s'poignet. 

"Bé, cha comminche bin no voyache de noce, j'sus d'jà plein d'poques et d'bosses !". 

Quançqu'i-seont arrivés l'prumier jour, dins l'belle ville autrichienne d'Salzbourg, ch'est à pied qu'i-ont visité l'cité et hureus'mint qu'Fifinne aveot pris des beons sorlets. Ave les visites de l'cathédrale Saint-Rupert, de l'abbaye bénédictine et du couvint des Capuchins, Edmeond i-s'a dit : "Si après tout cha je n'deviens pos ein saint, bé alors, Fifinne, j'n'y comprinds pus rien".

I-n'avot pos adveiné que l'jour suivant, i-in verreot acore autant. I-ont été visiter les églises Saint-Michel, Saint-Gaëtan et de l'Trinité, i-ont même vu l'chim'tière dusque l'veuve de Mozart elle est intierrée. 

"Bé, ch'n'est pus cha in voyache, ch'est ein véritape pélérinache. D'main, si on va vir l'maseon d'Mozart, t'iras tout seu, mi j'vas cacher après ein p'tit bar. J'ai ichi tell'mint seo que m'lanque elle fait drapéeau !".

Assis à la tape d'ein café i-diseot "prosit" à chaque feos qu'ein verre i-d'veot chiffler. Et ainsin, d'prosit in prosit, l'temps i-a passé et i-a été total'mint quervé.

I-éteot d'jà fort tard, quançqu'i a ortrouvé s'quémin et orjoint Fifinne à l'hôtel, là-vas, ch'n'est pos l'seon mélodieux de l'Flute Enchantée qu'i-a intindu à ses orelles.

"In orvenant, t'as eu de l'sanche de n'pos caire su l'eaute poignet, bé, biribi mes amis, j'areos été obligé de t'deonner à minger". 

Pindant l'temps libre du dernier jour, ch'est dins les magasins que Fifinne l'a immené, pou Edmeond ch'est ein vrai supplice, eine porménate du condamné. A l'fin de l'journée, i-seont rintrés dins eine maseon d'thé et ch'est des Mozartkugeln qui ont commindés. 

Fifinne li a dit :

"Te vas vir, ch'est fin beon, ch'est ein dessert soufflé crémeux".

Tout d'suite, i-li a répeondu :

"Ah beon, alors cha s'beot avé du mousseux !"

"Neon, comarate, te n'vas pos 'cor ichi faire la loi, avé cha, on va printe deux cafés viennois". 

Quançqu'i-seont orpartis, diminche au matin, Edmeond i-a dormi tout l'leong du qu'min. M'n'heomme i-ronfièleot tell'mint que l'chauffeur pinseot avoir ein problème à ses freins. 

A Tournai, ch'est in taxi qui seont ortournés à leu maseon et d'puis lors, i-n'feaut pus parler d'voyache à Edmeond. 

"Partir in voyache, dins chinquante ans pétête et... on ira visiter l'brasserie dusqu'on fait... l'Moinette. Après tout je n'sus pos tout seu à n'pus vouloir bouger, l'prince Philippe à Londres i-a aussi décidé de n'pus voyager, à partir d'asteur i-n'va n'pus sortir de s'catieau d'Buckingham et dins les receptieons et les voyaches i-n'accompagnera pus Madame. Li ch'est pus grafe acore pasqu'i-est appelé l'prince qu'on sort".

Les bienfaits du voyache éteot'ent d'jà terminés, ringeant les valisses, on a intindu Fifinne berler :

"Mais, mille milliards, espèce de podinque, on dit consort, cha veut dire l'mari d'la reine, l'ceu qui partache s'sort !".

(lexique : chinquante : cinquante / l'meos : le mois / quoisque : qu'est-ce que / ceul : cet / lommint : longtemps / busier : réfléchir, penser / asteur : maintenant / insanne : ensemble / canger : changer / pétête : peut-être / puque : plus / s'ortrouver : se retrouver / à mitan : à moitié / l'sape : la sable / moutrer : montrer / là-vas : là-bas / l'panche : la panse, le ventre / caire : tomber / les is : les yeux / ein lite : un litre / à l'feos : à la fois / l'voisinache : le voisinage / querre : chercher / orwettier (ou raviser) : regarder / l'ergard : le regard / ichi : ici / serré : fermé / adeon : donc / toudis : toujours / berteonner : grommeler, bougonner / à m'mote : selon moi, à mon idée / l'garde-rope : la garde-robe / l'berdoule : la boue / les ceusses : ceux / acater : acheter / ahais : oui / biêtes : bêtes (utilisé ici dans le sens de simple) / m'mamère : ma mère / ov'là : voilà / avoir l'pépette : avoir peur / cacher après perdu : chercher inutilement / innochint : innocent / le qu'min (ou l'quémin) : le chemin / quançque : lorsque / printe plache : prendre place / qu'mincher (ou commincher) : commencer / l'prumier : le premier / ouvère : ouvrir / eine pièche : une pièce / simpe : simple / jusse : juste / eine piéchette : une piécette, une petite pièce (d'argent) / déquinte : descendre / l'campe : la chambre / l'leumière : la lumière / l'tape : la table / leon : loin / ainsin : ainsi / bourler : tomber / ête courbatu : être courbaturé (expression qui s'entend souvent à Tournai) / ête dérévié : être réveillé / les queops : les coups / commincher : commencer / avoir des poques : avoir des ecchymoses / des sorlets : des souliers / adveiner : deviner / l'chim'tière : le cimetière / dusque : où / tout seu : tout seul / l'lanque : la langue / avoir s'lanque qui fait drapéeau : être assoiffé / chiffler ein verre : boire d'un seul trait, faire cul sec / quervé : ivre / l'sanche : la chance / eine porménate : une promenade / comarate : camarade / ronfièler : ronfler / l'catieau : le château / grafe : grave / berler : hurler, crier / ein podinque : un esbroufeur / l'ceu : celui ).

S.T. mai 2017. 

13:28 Écrit par l'Optimiste dans Loisirs | Lien permanent | Commentaires (1) | Tags : tournai, patois, picard |

14/04/2017

Tournai : expressions tournaisiennes (403)

Avril 2080 : Lette d'un garcheon d'no ville à s'mamère.

Tournai, l'dix-siept d'Avril 2080.

M'bin chère Mamère,

D'puis que te t'es ormariée et qu'pou la Suisse t'a quitté Tournai, te peux m'acroire, tout, ichi, i-a bin cangé.

L'jour dusque t'es née, l'sièque i-n'aveot qu'eine ainnée. Ainsin, cha t'fait septante-nuef ans depuis l'début du printemps. T'as connu les grands travéaux dins l'centre-ville qui seont dev'nus, asteur, total'mint inutiles. Cha a comminché pa l'fil d'or au mitan des rues, ceulle riche trouvale d'Mossieu Michelin elle n'a jamais tenu. Ein echevin i-aveot bin déclaré que, dins l'béteon, i-falleot tout simplemint l'visser mais quançqu'i-a intindu parelle idée, l'architecte d'prumière classe i-a été débalté. Après cha, ch'a été les pavés qui s'seont mis à jeuer les castagnettes, à chaque feos qu'i-passeot eine auteo ou bin eine camionnette. On a eu bieau les inl'ver et les ormette dix queops, quançqu'on rouleot pa d'zeur, cha f'seot ein boucan d'seot. Final'mint, les responsapes i-ont pris l'décisieon d'tertous les ertirer mais pa manque de liards, à l'plache, i-ont été obligé d'étinte du... gravier. Alors pou éviter l'poussière dins les maseons, partout dins l'ville on a interdit l'circulatieon. On a d'abord pinsé arroser mais l'cruéau i-a bin vite comminché à pousser et, comme les écoleos n'vouleot'ent pus qu'on pulvérise des produits chimiques, on s'a vite ortrouvé pa d'vant eine situatieon catastrophique. On veyeot même apparaîte des hierpes de la pampa, d'ein bout à l'eaute de l'rue Saint-Piat. Su l'plaine i-a bin lommint qui n'a pus d'chapiteau, à l'plache, on a agrandi l'parking pou les auteos. In incien Audax i-a proposé d'offère des véléos élestriques pou les visiteus qui veule'tent faire eine porménate touristique. 

Que l'ville elle soiche réservée uniqu'mint aux piéteons, ch'n'éteot pos, à vrai dire, eine si mauvaisse solutieon, après tout, les magasins i-ont, ein p'tit peu à l'feos, été serrés et i-n'a pus, dins les rues, que des restos et des cabarets. Comme ch'est tolérance zéreo pou l'conduite d'eine automobile, du queop, ch'est à pied qu'les gins s'in veont boire et minger in ville. On areot pu pinser que Tournai elle s'reot ainsin dev'nue eine ville dortoir, ahais, les gins ronfièlent pindant l'jour et sortent de leu maseon quançqu'i-fait noir. A partir de dix heures au soir, su les terrasses de la Grand-Plache, i-feaut presque battlier pou trouver eine plache. Les camions pou les poubelles i-passe'tent, tous les jours, à chinq heures au matin, à c'momint-là, cha fait d'jà deux heures qu'eine armada d'ambulances ramasse'tent les quervassins. On a fait appel à des privés pasque les gins du 112 i-éteot'ent débordés. L'réductieon des effectifs des peompiers et des policiers elle a qu'minché sous l'gouvernance du ceu qu'on app'leot "Gambeon Prumier" et après cha n's'a pos améloré !

I-a ein indreot dins l'ville qui est acore fort animé, comme au beon vieux temps, ch'est l'leong des quais. Cha fait pus d'chinquante ans aujordhui qu'l'Esqueaut, i-est dev'nu eine véritape autoroute à batieaux. Vu qu'jour et nuit, dins l'navigatieon i-a pos d'arrêt, l'pont Noter-Dame i-a fallu l'démeonter, ch'éteot pos l'peine de l'laicher, i-areot toudis été l'vé. Au début, pou calmer les gins, on n'aveot orconstruit des arches au Pont des Treos mais on s'a bin vite rindu queompte que les baquets éteot'ent freinés pa l'gouleot. Adeon, on a assisté à ein nouvieau démolissache et ch'est à l'intrée de l'rue Royale qu'on a plaché les arches. Pou que les vieux Tournisiens acore s'in rappelle'tent, soiche rasseurée, on a quand même laiché les tours jumelles. Tins, i-a aussi ein service d'navettes qui imbarque les gins à Allain pou les déposer à l'Borgnette, Ainsi, si aux Bastions, les clients n'ont pos trouvé leu bonheur, i-seont au complexe d'Froyennes in moinse d'ein quart d'heure. 

tournai,patois,picard

Ave m'feimme et les infants, pos pus tard qu'hier, on a passé toute l'journée au bord d'la mer. Quançque j'raqueonte aux infants que te f'seos près d'deux heures de route pou ti aller bronzer su l'sape de Knokke le Zoute, i-m'orwettent comme si je leu diseos des cacoules ou s'demindent si j'n'deviens pos maboul. Comme d'puis chinq ans, la mer elle est asteur inter Ypres et Courtrai, Tournai la Plache qui aveot lieu dins l'temps su les quais, cha va béteôt ête eine réalité. Aller péquer des guernates à l'incien quai des guernoules ou bin faire de l'plongée sous-marine à l'incienne gare margarine, dins vingt ans, si cha continue ainsin, no port fluvial i-s'ra dev'nu port maritime. Bah, cha f'ra toudis du bouleot pou les ceusses qui veont louer des pédaleos. 

On a fini d'aménager no nouvelle maseon à l'rue du P'tit Rudy, i-paraît que ch'est l'neom d'ein incien bourguémette quançque te d'meureos acore ichi. Pou li deonner s'neom, on a débaptisé l'rue des Bleuets, tout à fait inter-nous, j'pinse qu'on s'a seûrmint trompé. On areot mieux fait d'canger l'neom de l'rue des Roseliers. Mi qui aimeot bin ouvrer au gardin, d'puis deux ans j'n'y fais pus rien. Avé 45° in plein meos d'juillet, mes p'tits légueimes i-seont tout déssequés. J'arroseos tous l'matin mes pichoulits et mes barpes d'capuchin, l'soir i-éteot'ent couchés et orséqués su l'terrain. Quoisque te veux, ch'est l'résultat du récauff'mint climatique qui a trinsformé in désert l'presque totalité d'l'Afrique et orcouvert d'ieau eine beonne partie d'no Belgique. Te m'moutreos souvint des photeos avé les neiches éternelles, i-feaut les raviser asteur pou qu'on s'in rappelle. 

Ov'là les toutes dernières nouvelles de l'cité des cheonq clotiers, si t'orviens ein jour, comme te le veos, te vas ête dépaysée.

P.S. : In t'écrivant, j'ravise du coin d'l'ouel m'compteur geiger, ch'est ein apparel rud'mint nécessaire d'puis qu'in 2050, à Tihange, l'cintrale nucléaire a invéyé des atomes s'porméner dins l'air. Ch'est grâce aux éoliennes et aux panneaux solaires qu'aujourd'hui dins nos maseons on s'éclaire et dire qu'i-aveot de d'grands esperts qui n'arrêteot'ent pos d'déclarer : "l'cuve du réacteur elle est troée mais i-a pos d'quoi s'inquiéter". I-aveot'ent fait des études poussées mais on aveot seul'mint oblié que ch'est pa les reponsapes de l'élestrique quee mes gins i-éteot'ent payés !

J'te fais eine baisse,

T'pétit Batisse.

(lexique : l'lette : la lettre / l'garcheon : le garçon / l'mamère : la mère / ormarier : remarier / acroire : croire / ichi : ici / canger : changer / dusque : où / l'sièque : le siècle / nuef : neuf / asteur : maintenant / commincher (ou qu'mincher) : commencer / au mitan : au milieu / ceulle : cette / trouvale : trouvaille / parelle : pareille / prumière : première / débalté : exaspéré, déchaîné / jeuer : jouer / dix queops : dix coups, dix fois / quançque : lorsque / pa d'zeur : dessus / tertous : tous / les liards : l'argent / étinte : étendre / l'cruéau : les mauvaises herbes / ortrouvé : retrouvé / on veyeot : on voyait / des hierpes de l'pampa : des herbes de la pampa / bin lommint : bien longtemps / offère : offrir / élestrisques : électriques / eine porménate : une promenade / soiche : soit / ein p'tit peu à l'feos : un petit peu à la fois, progressivement / ête serré : être fermé /  du queop : du coup, dès lors / ahais : oui / ronfiéler : ronfler / battlier : batailler, se battre / eine plache : une place / chinq : cinq / les quervassins (ou les quervés) : les ivrognes / qu'mincher (ou commincher : commencer) / ein indreot : un endroit / l'leong : le long / chinquante : cinquante / laicher : laisser / toudis : toujours / s'rinte queompte : se rendre compte, remarquer / les baquets; les péniches, les bateaux fluviaux / adeon : donc / rasseurée : rassurée / l'feimme : la femme / l'sape : le sable / orwettier (ou raviser) : regarder / des cacoules : des mensonges, des contes à dormir debout / inter : entre / béteôt : bientôt / péquer : pécher / les guernates : les crevettes / l'quai des guernoules : le quai des grenouilles / les ceusses : ceux / ein bourguémette : un bourgmestre (en Belgique), un maire (en France) / seûrmint : sûrement / ouvrer : travailler / l'gardin : le jardin / les légueimes : les légumes / désséqué : desséché / les pichoulits : les pissenlits / les barpes d'capuchin : les barbes de capucin / orséqué : desséché / quoisque : qu'est-ce que / moutrer : montrer / les neiches : les neiges / raviser (ou orwettier) : regarder / ov'là : voilà / les cheonq clotiers : les cinq clochers / l'ouel : l'oeil / invéyé : envoyé / les esperts : les experts / troé : troué / oblier : oublié / l'élestrique : l'électricité / j'te fais eine baisse : je t'embrasse, bons baisers).

Jusse avant d'orfermer ceulle pache, j'vous souhaite à tertous eine beonne et hureusse fiête de Pâques. Diminche, je vous conselle d'aller vir dins vo gardin si les cloques elles n'ont pos laiché des oués in chucolat et si ch'est pos l'cas, alors lindi, n'hésitez pos à printe ein bâteon pou vous rinte au Meont de l'Ternité (ch'est ainsin qu'on appelle aussi l'Meont Saint-Aubert), i-ara là-vas seûrmint ein masse d'amisses et d'connissances et bramint d'occasieons d'goûter l'jus du houbleon.  

photo : montage Courrier de l'Escaut.

S.T. avril 2017.

10:20 Écrit par l'Optimiste dans Loisirs | Lien permanent | Commentaires (0) | Tags : tournai, patois, picard |

08/04/2017

Tournai : expressions tournaisiennes (402)

L'nostalgie d'Edmeond. 

A l'fin d'l'hiver, ch'est l'même histoire chaque ainnée, pindant tout l'meos d'avril Edmeond i-est démoliné. Tout au leong d'eine sainte journée, i-n'arrête pos d'parler du temps passé. 

"Je m'deminde ce que j'fais acore su ceulle tierre, l'Optimisse, te sais, no vie elle éteot bin pus belle hier".

Rien que pou li faire plaisi, jeudi dernier, j'l'ai acouté pindant tout l'après-deîner et quançqu'au soir à m'maseon j'sus rintré, j'aveos l'impressieon d'ête moral'mint desterminé. Vous n'allez pétête pos m'acroire mais pou l'restant de l'sémaine, l'nunu-cabadèche d'Edmeond i-m'a foutu eine riche démigraine.

Ov'là ichi tout ce qui m'a débabeiné et, acore, i-d'a la mitan que j'ai oblié : 

"Avant, l'propreté, ch'éteot l'prumier des soucis, tous les verdis, m'mamère elle feseot s'saim'di. Elle metteot ses bottes et elle nettieot l'intièr'té de l'maseon, elle feseot l'cuisine et l'couloir à l'brouche et au noir saveon. Elle ortireot les arnitoiles avé l'tiête de leu et elle récureot au Sidol, la taque du feu. Elle feseot blinquer les cuifes et les argint'ries et, à l'velle de Pâques, elle chireot toutes les boiseries. Même l'trottoir, dusqu'i-n'aveot jamais ein brin d'tchien, i-éteot astiqué et les ceusses qui nettieot'ent inl'veotent bin vite de l'rigole les rares papiers. I-falleot vir comme elle éteot hureusse que tout soiche fraîque, que tout sinte beon quançque des amisses, l'diminche, veneot'ent deîner à no maseon. 

Dins les rues, comme elles n'aveot'ent pos 'cor été invintées, on n'veyeot pos, comme asteur, des dizaines de canettes ruées su l'pavé. Les paquets d'frites ch'est dins les poubelles qu'on s'in débarrasserot, ch'n'est pos, comme d'nos jours, su l'quémin qu'on les laicheot. I-arriveot alfeos qu'ein quervassin, au p'tit matin, pa d'vant vo maseon démaqueot mais à l'prumière heure du jour, in ruant ein séeau d'ieau, s'carte de visite elle parteot.

Tertous, on n'aveot du respect pou l'ouvrache qui aveot été fait, on saveot combin d'argint, pou des travéeaux, i-aveot été dépinsé, du queop, su les murs, on n'garchenneot pos l'traval, i-n'aveot pos d'tags dessinés pa des vandales. Les étudiants canteot'ent pétête à tue-tiête, de l'nuit, dins les rues et les rulettes mais jamais pou biêt'mint s'amuser i-n'areot'ent buqué su l'prumière perseonne qui'v'neot'ent à croiser. Pindant chinq ainnées, on aveot connu l'guerre et, dins l'misère, les gins éteot'ent solidaires. 

On n'alleot pos à l'école jusqu'à quinze ans mais dins l'vie on saveot tirer s'plan, on ouvreot nuève heures su eine journée et l'soir venu on n'aveot pos l'temps d'aller lusoter. Les gins n'aveot'ent pos bramint d'certificats mais i-saveot'ent écrire presque sans feautes eine lette, ch'n'est pos comme l'espèce de charabia qu'on lit aujord'hui su internet.

On n'aveot pos b'soin d'paradis artificiels, on n'queureot pos les boîtes de nuit, on buveot et mingeot des produits naturels et eine beonne crasse pinte nous donneot du lari. A minuit, à s'maseon, ch'est à pied qu'on ortourneot et si, berzèque, on rincontreot alfeos ein piquet, on n'déploreot qu'ein boursieau et, su les routes, i-aveot beauqueop moinse d'tués.  

Comme on n'aveot pos 'cor l'télé, l'soir, on n'éteot pos prisonnier. L'hiver, on alleot jeuer à cartes chez les visins et l'été, on raconteot nos avintures de l'journée dins l'gardin. On pouveot laicher les portes ouvertes, on veyeot raremint ein agripeu et aux portes des magasins, on n'éteot pos constammint harcelé pa les brimbeus. Les agints feseot'ent leu reonde à pied, deux pa deux, et i-croiseot'ent pus souvint l'route d'ein buveu que d'ein voleu. 

Nos interprisses su l'territoire communal ou régional n'éteot'ent pos dirigées pa des multinationales. Carton, Meura, Desclée, Casterman, ch'est pa chintaines que les jeones trouveot'ent du traval. T'y rintreos avant vingt ans et te sorteos, à l'ortraite, à soixante-chinq ans. Quançqu'i-sorteot'ent d'l'école, les jeones n'cacheot'ent pos lommint après d'l'ouvrache, i-n'deveot'ent même pos s'inscrire au chômache et les patreons n'planqueot'ent pos des liards dins des paradis à Jersey ou aux Philippines, i-préféreot'ent bin mieux investir l'argint gagné dins ein nouvel otiache ou eine machine pou l'usine.

Dins l'temps, les politiciens i-s'metteot'ent su les listes pou servir leu populatieon et pos pou s'in foute plein l'portefuèle comme ch'est asteur leu prumière des préoccupations. Je n'dis pos, les p'tits peots d'vin cha a toudis existé mais, asteur, ch'est pa des pipelines intiers qu'mes gins i-seont arrosés. 

Edmeond i-éteot tell'mint débalté qui n'aveot pu moyen d'l'arrêter. I-a tout passé in orvue : les Racingmen et les Unionisses qui jeueot'ent au fotbal pou ein kileo d'bure ou d'saucisse, les vedettes de l'cancheon qui n'gagneot'ent pos des millieons, les opérettes et les opéras qu'on pouveot acore aller vir à l'Halle-aux-Draps, l'balleon qu'on alleot vir meonter le lindi de l'karmesse su l'plache Crombez, l'traversée d'Tournai in natatieon dins ein Esqueaut pos acore touché pa l'pollutieon...  

Quoisque vous voulez que j'pouveos acore dire après eine parelle litanie, j'ai berdélé deux treos meots qui n'a pos compris et infin j'li ai dit :

"Mais Edmeond, i-feaut vife avé s'temps, i-n'feaut jamais orwettier in arrière, même si ch'n'est pus comme avant, i-n'veaut mieux pus pinser à hier. N'ravise pus l'télé, n'ouvère pus les gazettes, n'acoute pus les journaux parlés et surtout laiche caire internet et, ein beon consel... inter nous, évite les cabarets, pasqu'au comptoir, on n'queompte pus les cacoules qui y seont raqueontées. Edmeond, m'n'amisse te deos arrêter de t'masinguer pasque j'sus seûr que pour Fifinne ch'n'est pos fort gai. Intinte s'délaminter s'n'heomme à tous les momints, cha deot deonner à ceulle paufe feimme bramint d'chagrin. Viens t'porméner avé mi dins les beos et les camps, on ravisera les fleurs et des osieaux, on acoutera l'cant. Te verras les grands arpes onduler avé l'vint et l'air ein peu fraîque su t'visache i-t'f'ra du bin. Arrête de busier, cha t'fait du mau, cache après tout ce qui est bieau".

(lexique : ête démoliné : être démoralisé / tout au leong : tout au long / ceulle : cette / acouter : écouter / l'après-deîner : l'après-midi / desterminé : détruit / pétête : peut-être / acroire : croire / l'nunu-cabadèche : un qui fait des petits contes pour rien / l'démigraine : la migraine / ov'là ichi : voilà ici / débabeiner : raconter ses heurs et malheurs / la mitan : la moitié / l'verdi : le vendredi / m'mamère : ma mère / faire s'saim'di : faire le nettoyage hebdomadaire / nettier : nettoyer / l'brouche : la brosse / l'noir saveon : le savon noir / les arnitoiles : les toiles d'araignées / l'tiête de leu : la tête de loup / faire blinquer : faire briller / les cuifes : les cuivres / l'velle : la veille / chirer : cirer / ein brin d'tchien : une déjection canine / astiquer : rendre propre, brillant / les ceusses : ceux / vir : voir / fraîque : fraîche / deîner : dîner / asteur : maintenant / ruer : jeter / l'quémin : le chemin / alfeos : parfois / ein quervassin: un ivrogne / pa d'vant : devant / démaquer : vomir, remettre / ein séeau : un seau / tertous : tous / du queop : du coup, dès lors / garchenner : abîmer / canter : chanter / les rulettes : les ruelles / buquer : frapper / tirer s'plan : se débrouiller / ouvrer : travailler / nuève : neuf / lusoter : flâner / bramint : beaucoup / queurir : courir / deonner du lari : mettre en joie / berzèque : éméché / ein boursieau : une bosse (suite à un coup) / moinse : moins / jeuer : jouer / les visins : les voisins / l'gardin : le jardin / ein agripeu : un voleur, un chapardeur / ein brimbeu : un mendiant / les interprisses : les entreprises / les chintaines : les centaines / les jeones : les jeunes / l'ortraite : la retraite (en Belgique on dit plus souvent la pension) / cacher après : chercher / lommint : longtemps / les liards : l'argent / l'otiache : l'outillage / s'in foute : s'en mettre / l'portefuèle : le portefeuille / débalté : déchaîné / passer in orvue : passer en revue, faire le point / l'bure : le beurre / l'cancheon : la chanson / l'karmesse : la kermesse / parelle : pareille / berdéler : bredouiller / vife : vivre / orwettier : regarder / raviser : regarder / inter : entre / les cacoules : histoires inventées, mensonges, les "hoax" comme on dit aujourd'hui / s'masinguer : se faire du mauvais sang / ête seûr : être sûr / s'délaminter : se lamenter / porméner : promener / les beos : les bois / les camps : les champs / les cants : les chants / les arpes : les arbres / busier : ruminer / faire du mau : faire mal).

S.T. avril 2017.

13:17 Écrit par l'Optimiste dans Loisirs | Lien permanent | Commentaires (1) | Tags : tournai, patois, picard |

31/03/2017

Tournai : expressions tournaisiennes (401)

Les orcettes de cuisine d'Fifinne.

Pindant l'sémaine, no brafe Fifinne, elle a acore bin ouvré dins s'cusine. Elle nous a préparé ein bieau p'tit deîner et j'sus seûr que vous allez vous régaler.

Les anwiles au vert à l'mote Fifinne.

Vous avez ormarqué, quançqu'on parle d'anwiles, i-a des gins qui feont gnien-gnien mais, mi, j'préfère acore cha aux insectes qu'on vind asteur dins les magasins. Ein vier, ein sautérieau ou bin eine mouque, je n'me veos pos mette cha dins m'bouque

Pou faire les anwiles au vert à l'mote Fifinne, i-ara des ingrédients plein l'tape de l'cuisine. 

Pou deux perseonnes, i-feaut queompter six à siept chints grammes d'anwiles, la mitan d'ein céleri, ein bieau greos ogneon, chint grammes d'persin, six ou siept fuèles d'épinards, six ou siept fuèles d'oselle, six fuèles d'chitreonnelle, de l'sauge verte, ein bieau bouquet d'cresseon, ein fuèle de laurier, ein cleo d'girofle, ein peu d'cherfoué, ein peu d'dragone, eine branque d'thym, du poife du moulin, du , ein chitreon, eine cuillère d'fareine, soixante grammes d'bure, treos oués et eine pétite boutelle d'vin blanc (ein beon p'tit Muscadet).  

Vous pouvez d'minder à vo marchand d'pisseon d'vous préparer et nettier les anwiles, i-n'vous restera pus qu'à les coper in tranques de chinq chintimètes invireon. 

Vous allez commincher pa laver vos légueumes pou inl'ver tous les produits chimiques qu'on met pa d'zeur dins les camps et les gardins

Vous copez vo céléri in dés et vous l'mettez à cuire pindant invireon ein quart d'heure dins ein peu d'ieau. 

Vous allez insuite faire cuire vos anwiles, passées dins l'fareine, à feu vif pindant chinq minutes dins l'bure ave l'ogneon haché. Pou que cha n'colle pos dins l'feond de l'marmite, i-feaut ormuer d'temps en temps. Vous allez verser pa d'zeur quarante à chinquante chintilites de vin pou les orcouvrir (Edmeond i-mettreot bin l'boutelle intière), mette dins vo préparatieon l'céleri (in ortirant l'ieau bi seûr) mais aussi ajouter : vos fuèles d'épinards, d'oselle et d'chitreonelle, l'bouquet d'cresseon, l'dragone, l'persin haché, l'fuèle de laurier, l'cléo d'girofle, l'sauge verte, ein peu d'cherfoué, du sé, du poife du moulin. Vous allez alors laicher cuire pindant ein p'tit quart d'heure en ormuant avec eine spatule. Vous ortirez l'tout de l'flamme. Pou lier l'sauce, vous allez alors ajouter treos guéaunes d'oué. Jusse avant d'servir vous laichez couler su les anwiles ein filet d'jus d'chitreon. Cha peut s'minger quieaud ave des penn'tieres ou bin freod ave du pain. 

Edmeond qui truèfe toudis occasion de s'mette in vedette, i-a voulu eine feos acore apparaîte dins l'orcette, i-vous deonne l'consel de l'sémaine : accompagnez toudis l'plat d'ein Muscadet d'Sèvre et Maine. 

L'clafouti d'Fifinne.

Ov'la ichi ein dessert pou minger au mitan d'l'après-deîner quancque les anwiles du midi elles seont bin digérées. Cha, avé eine jatte d'chéribeon, ch'est l'momint attindu pa Edmeond. 

On va à nouvieau rimplir l'tape ave les ingrédients : chint grammes d'fareine (du gruéau comme on dit à Tournai), quarante grammes d'Maïzena, ein peu d'sé, chint-quatre vingt grammes d'chuque fin et ein sachet d'chuque vanillé, deux cuillerées à café d'levure sèque, deux oués, septante-chinq ml d'lait et deux belles peommes (Fifinne elle prind toudis des Jonagold).

Pou faire ceulle préparatieon, vous avez b'soin d'ein moule d'vingt-quate chintimètes d'diamète et d'invireon six chintimètes de hauteur (ch'est précis, ch'est pou que cha meonte mieux !). 

Dins ein saladier, vous allez mette l'fareine, l'maïzena, l'levure, eine pincée d'sé, deux cuillerés à café d'levure sèque, l'chuque fin et l'sachet d'chuque vanillé (cha orprésinte dix grammes).

Vous allez bin mélanger l'tout (n'orwettiez pos à bin malaxer) puis ajouter les oués et les septante-chinq ml d'lait. Et vous allez continuer ainsin à bin touiller (vir ouvrer les mains d'eine feimme dins l'fareine, ch'est l'pus bieau des gestes qu'on veot dins eine cuisine).

L'pâte ainsin obtenue, vous allez l'mette dins l'moule que vous avez beurré. Vous épluchez les deux peommes et les copez in fines tranques (Fifinne elle appelle cha des lamelles). Vous les étalez su l'pâte. Vous allez mette précauffer vo four à 180° et puis y mette l'moule pou eine demi-heure. (N'obliez pos d'raviser d'temps en temps si cha dore bien et qu'cha n'brûle pos)

L'démoulache i-est important, si vo moule i-a été bin beurré, cha deot aller tout seu. Vous posez alors vo clafouti sur eine grille et vous laicher orfroidir.

Fermez vo porte d'cuisine à clé si, à vo maseon vous avez des galfards comme Edmeond.

tournai,patois,picard

 

(lexique : eine orcette : une recette / brafe : brave / acore : encore / ouvrer : travailler / eine deîner : un dîner (repas du midi en Belgique) / ête seûr : ête sûr / les anwiles : les anguilles / à l'mote : à la façon, à la mode / quancque : lorsque / faire gnien-gnien : faire la fine bouche, rechigner / asteur : maintenant / les viers : les vers / ein sautérieau : une sauterelle / eine mouque : une mouche / l'bouque : la bouche / l'tape : la table / queompter : compter / chint : cent / l'mitan : la moitié / l'persin : le persil / les fuèles (ou fouèles) : les feuilles / l'oselle : l'oseille / l'chitreonnelle : la citronnelle / ein cléo : un clou / du cherfoué : du cerfeuil / de l'dragone : de l'estragon / eine branque : une branche / du poife : du poivre / du sé : du sel / ein chitreon : un citron / de l'fareine : de la farine / l'bure : le beurre / les oués : les oeufs / l'marchand d'pisseon : le poissonnier / nettier : nettoyer / coper : couper / les tranques : les tranches / les légueumes : les légumes / pa d'zeur : dessus / les camps : les champs / les gardins : les jardins / ormuer : remuer / ortirer : retirer / laicher : laisser / les guéaunes : les jaunes / jusse : juste / quieaud : chaud / les penn'tières : les pommes de terre / freod : froid / i-truèfe : il trouve / ichi : ici / eine jatte d'chéribeon : une tasse de très bon café / du gruéau : de la fine fleur de froment / l'chuque : le sucre / sèque : sèche / ceulle : cette / orprésinter : représenter / orwettier (ou raviser) : regarder / touiller : mélanger / vir : voir / précauffer : préchauffer / tout seu : tout seul / des galfards : des gourmands).

S.T. mars 2017.

11:26 Écrit par l'Optimiste dans Loisirs | Lien permanent | Commentaires (0) | Tags : tournai, patois, picard |

24/03/2017

Tournai : expressions tournaisiennes (400)

Quate chintième babillarte !

Cha fait asteur quate chints saim'dis qu'in patois d'Tournai j'vous écris. Mo Dieu, bé comme l'temps passe et vite s'écoule, cha fait d'jà huit ainnées que j'raqueonte des cacoules ! In m'lisant, vous l'avez seûrmint adveiné, j'sus vraimint fier d'ête ein infant d'Tournai et je n'veux pos que l'parler d'ichi i-soiche oblié que, pa des gins parlant eine eaute lanque, i-soiche déméprisé

No patois, ch'est no symbole, no signe de ralliemint, ch'est l'incestral lien qui unit tous les Tournisiens. L'ceu qui veut, eine feos, intinte ces meots qu'on dit dins l'cité des cheonq clotiers, in ouvrant ses orelles pou bin acouter, i-n'a qu'à aller porméner dins nos rues, nos rulettes ou bin l'leong d'nos quais .

J'sus seûr que dins toutes les conversatieons, i-intindra toudis au moinse eine de ces espressieons : 

D'ein qui n'in a jamais assez, pou bin définir l'perseonne, on dit : "M'n'heomme i-li faudreot l'gardin et les preones". On dit pou ein rusé, ein soucard : "Dusqu'i-s'perdra, i-f'ra noir !". On dit pou ein heomme qui veut passer inaperchu, ein qu'on a jamais ermarqué : "I-fait l'effet d'ein grain d'aveine dins l'gueule d'ein baudet".  Pou ein individu maiguerleot, on dit que "ch'est ein carilleon d'ossiéaux". On dit d'ein heomme qui fait du mauvais ouvrache, d'ein bricoleu, d'ein cafouilleu : "Et bé m'n'heomme, i-est adreot d'ses mains comme ein pourchéau de s'queue". Pou désigner ein qui aime bin l'biere et qui est toudis quervé, vous risquez pétête d'intinte : "M'heomme i-buvreot Bapéeaume et ses fossés" cha m'étonnereot... cha n'est pus fort utilisé, asteur, on parle avant tout "d'ein potieau d'cabaret". Pou ein vantard, ein qui s'prind toudis l'tiête, on dit :"Ein heomme qui s'vante et ein baudet qui s'gratte ch'est deux bellés biêtes". Cha va alfeos vous choquer quançque vous intindrez pou ein heomme qui est in train d'agoniser ; "I-n'a pus beauqueop d'sanche, s'cul i-sint l'louchet", rasseurez-vous, cha n'est pos de l'vulgarité, diseons que ch'est ein peu... imagé. Là dusque j'sus d'accord d'dire que ch'est vraimint grossier, ch'est quançqu'on anneonche que "l'feimme est impanch'loutée". Ces meots-là cha m'fait pinser au ceu qui n'a pos l'langache fort raffiné, ainsin on dira d'ein qui parle platemint : "à m'mote que m'n'heomme i-n'tamisse pos fin !". Pou ein heomme qui a marié eine feimme infidèle, eine qui a l'habitude d'aller vir ailleurs si l'hierpe elle est pus belle, on li dira, in guisse d'consolatieon et pou n'pos treop s'in faire : "I-véaut mieux ête wieot qu'aveule : on veot ses confrères". Cha m'fait pinser à ceulle phrase que j'ai intindue concernant ein malhureux qui éteot cocu :"L'curé li ouvère l'porte à double battants, pou qui n'accroche pos ses cornes in rintrant". Vous avez pétête rincontré dins vo vie, ein profiteu, ein heomme du ginre pique-assiette, d'li on dira : "Pou li minger à l'ouel, s'bouque elle f'reot l'tour de s'tiête". 

Ein bieau jour, des gins de la héaute société on voulu interdire l'patois d'Tournai. Pa ces jocrisses, i-a été banni des classes des écoles, ch'est simpe, si on l'parleot, on attrapeot eine colle. Si te diseos "ahais Mossieu" pou répeonte à eine questieon, te t'ortruèveos, vite fait bin fait, avé eine punitieon. On d'veot copier chint feos, in calligraphie : "En français on répond oui, le maître me l'a souvent dit".

Comme diseot Mossieu Parvenu et Madame Proutemachère : 

"Mon Dieu que ce langage est vulgaire, il définit bien les classes populaires, si un enfant veut s'élever dans la société, on doit lui interdire cette façon de parler". 

"Bé queompte là d'zeur et beos d'l'ieau, t'aras des clairs boyéaux", si à l'école on éteot obligé d'parler l'lanque de Voltaire, à nos maseons l'maîte i-n'pouveot pos v'nir nous faire taire. 

Tous ces gins qui, pou parler, metteot'ent les preones dins les quertins, i-ont été fameus'mint estoqués pa l'succès du Cabaret Walleon Tournisien. Du patois, ces gins-là i-n'sav'tent pétête rien mais, pou nous eautes, acouter les Filles Celles Picardes, Bruno Delmotte ou les canteus du Bistreot Tournaisien, ch'est bin leon d'ête du flamind. 

I-n'ont jamais voulu comprinte tous ces adeptes du beon langache, que ch'est l'patois de l'Ile de France qui est, peu à peu, dev'nu l'usache. 

Nos incêtres, nos aieux, nos parints qui nous ont éduqués, i-n'conniseot'ent pétête pos deux meots d'Français mais i-ont quand même fait des infants qui, dins l'société, peuv'tent, aujord'hui, s'débrouiller. 

Dins no beonne ville d'Tournai, tertous on sait qu'eine perseonne qui a l'bazin, ch'est eine qui est prisse d'trimblemints, qu'ein heomme qui su s'freont i-a ein riche boursieau, ch'est pasqui-a eine bosse après eine mauvais queop. I-n'feaut pos nous espliquer quançqu'on dit qu'on a brichaudé l'argint, on comprind tout d'suite qu'on a gaspillé les liards comme chez Publifin. On s'déméfie des cache-à-puches et des mordiquéaux, i-cache'tent toudis à batt'lier, à vous bourrieauder, à vous inveyer à l'hosto. A Tournai, à Ath ou à Mouscreon, on a tertous nos espressieons, ch'est no carte d'idintité, ein espèce d'marque d'fabricatieon. 

Si vous m'suivez d'puis l'prumier artique, vous n'avez pus b'soin du lexique et si vous êtes fidèle d'puis l'prumière rubrique vous pouvez me l'faire savoir pa ein commintaire, même laconique.

In attindant, l'sémaine qui vient, on orpalera d'cuisine grâce, bin seûr, aux orcettes de no beonne Fifinne !

(lexique : eine babillarte : une lettre / asteur : maintenant / quate chints : quatre cents / saim'di : samedi / des cacoules : des carabistouilles, des histoires inventées / adveiner : deviner / ein infant : un enfant / ichi : ici / eine eaute lanque : une autre langue / démépriser : mépriser / l'ceu : celui / eine feos : une fois / les cheonq clotiers : les cinq clochers / acouter : écouter / porméner : promener / les rulettes : les ruelles / l'leong : le long / seûr : sûr / au moinse : au moins / l'gardin : le jardin / les preones : les prunes / ein soucard : un sournois / dusque : où / inaperchu : inaperçu / l'aveine : l'avoine / ein maiguerleot : un homme très mince / les ossiéaux : les os / ein ouvrache : un ouvrage, un travail / ein cafouilleu : personne qui agit de façon désordonnée, qui ne sait pas par où commencé l'ouvrage / ein pouchéau : un porc, un cochon / quervé : ivre / pétête : peut-être / ein potieau d'cabaret : un pilier de bar / alfeos : parfois / quançque : lorsque, quand / l'sanche : la chance / l'louchet : la bêche (dans ce cas celle du fossoyeur) / anneoncher : annoncer / impanch'loutée : enceinte / platemint : platement / à m'mote : à mon idée / tamisse : tamise / l'hierpe : l'herbe / in guisse : en guise / wieot : cocu / ein aveule : un aveugle / ceulle : cette / l'ouel : l'oeil / l'bouque : la bouche / simpe : simple / ahais : oui / queompter : compter / là d'zeur : là-dessus / l'ieau : l'eau / l'maseon : la maison / mette les preones dins les quertins : phrase souvent entendue qui signifie parler avec emphase / ête estoqué : être abasourdi, frappé à mort / les canteus : les chanteurs / ête bin leon : être bien loin / tertous : tous / avoir l'bazin : être pris de tremblements / ein boursieau : une bosse, un hématome / ein queop : un coup / brichauder : gaspiller / les liards : l'argent / s'déméfier : se méfier / les cache-à-puches : personnes qui recherchent la bagarre,, qui cherchent continuellement noise / des mordiquéaux : des sales individus / batt'lier : batailler / bourrieauder : brutaliser / inveyer : envoyer / l'prumier artique : le premier article / les orcettes :les recettes).

S.T. mars 2017.

08:59 Écrit par l'Optimiste dans Loisirs | Lien permanent | Commentaires (1) | Tags : tournai, patois, picard |

10/03/2017

Tournai : expressions tournaisiennes (399)

Les démeons d'Edmeond.

Ch'est ainsin, chaque ainnée, dès qu'les prumiers bieaux jours i-seont d'ertour, quançqu'on li parle de s'n'heomme Edmeond, l'sang de l'paufe Fifinne i-n'fait qu'ein tour. 

"M'n'heomme, à peine qu'i-veot apparaîte l'solel, i-n'tient pus in plache, i-n'a pus qu'eine seule idée dins s'tiête queurir à l'Grand-Plache. Là-vas, i-ortruèfe ses amisses, les potieaux d'cabaret et les tournées comminche'tent alors à défiler. Ch'est toudis l'même cosse et cha va ête ainsin... jusqu'à l'karmesse d'sétimpe et même jusqu'à l'Toussaint. Après i-va s'mette à hiberner, rester dins s'fauteul au coin de l'quémeinée ave toudis l'jus d'houbleon à proximité".

On peut dire que pa les deux bouts, i-est in train d'brûler l'candelle mais ch'n'est pos facile de l'faire comprinte cha à ein compagneon de l'dive boutelle.  

Pourtant, l'sémaine passée, Edmeond i-a été à l'hôpital pou faire, de s'santé, ein bilan général. Les résultats seont pou l'moinse catastrophiques, l'docteur li a dit qu'i-aveot l'foie d'ein alcoolique.

"Vous devez absolumint mette l'frein sineon je n'répeonds pus de rien" qui li a dit l'médecin.

"Bé... cha fait asteur d'puis l'Toussaint que j'n'ai pos bu ein verre de vin et, vous pouvez l'deminder à m'feimme, pindant l'hiver ch'est uniqu'mint quançque j'sus pa d'vant l'télé que j'beos de l'bière".

"Ahais, seul'mint l'télévisieon elle comminche avant midi et, bin souvint, l'capenoul i-s'indort pa d'vant à minuit".

In intindant cha, l'docteur i-l'aveot compris, Fifinne elle éteot bin léon d'définte s'mari. 

Edmeond i-a cru beon de s'justifier :

"Quoisque te veux qui pourreot là s'passer, j'n'ai pos d'quémin à ortrouver, ein accidint n'sareot pos m'arriver à moinse de printe les pieds dins l'carpette de l'salle à minger".

"Vous veyez, docteur, i-n'a pos ein beon meot à orchevoir d'ein vieux seot, quançque vous voulez li dire eine séquoi, i-a toudis eine escusse à mette au tréo, Mossieu i-est toudis pus malin que l'z'eautes, Mossieu, i-li feaut toudis faire à s'mote. Ch'est ainsin d'puis qu'on est marié, d'puis l'temps, bé... j'sus asteur habituée. S'mamère elle m'aveot pourtant prévenue avant de l'marier, elle m'aveot dit qu'i-buvreot Bapaume et ses fossés !".

"Bé biribi, mes amis... Docteur, si tous ses esploits d'quervé, j'deos ichi vous raqueonter, les dix perseonnes qui seont acore dins l'salle d'attinte vous pouvez les rinveyer". 

"Pou éviter eine cirrhose, on va toudis commincher pa vous sevrer, seul'mint deux bières légères pa jour seont autorisées" qui a dit l'docteur qu'Edmeond commincheot à amarvoyer

Su s'cayère Edmeond i-feseot des beonds :

"Si j'comprinds bin j'vas ichi devoir faire carême pou arriver à perte pétête chint grammes à m'boudaine !". 

Fifinne s'ortourna et dit à s'nheomme :

"Bé, t'es toudis obligé d'défaire l'blouque de t'mareonne. On t'offère ichi eine sanche de désinfler t'grosse panche. L'docteur i-dit que t'as ein foie comme eine oie du Sud-Ouest, si te continues ainsin te vas mourir étouffé pa t'graisse ".

Bé ahais, autant li canter Malbrouck, Edmeond ch'n'est pos possipe d'l'arrêter surtout qu'i-va, l'ainné prochaine, fiêter ses... soixante ans d'présince dins ein cabaret. I-a chifflé s'prumière pinte à l'âche d'quatorze ans, c'jour-là, i-aveot orchu chinq francs à s'moneonque Fernand. 

Comme i-z'éteot'ent à cours d'argumints, i-seont infin sortis d'chez l'médecin.

Pour orvenir de l'consultatieon du docteur Martinache, nos deux amisses deveot'ent traverser l'Grand-Plache.

Fifinne elle a bin vite ormarqué que l'cabaret dusque s'n'heomme i-aveot l'habitude d'aller i-éteot serré.

"Merci, Beon Dieu, vous avez intindu l'prière que j'vous ai adressée, ainsin, on va pouvoir ortourner à no maseon sans nous arrêter". In prononchant ces meots Fifinne elle orwettieot l'cathédrale in pinsant que pou s'adresser au Beon Dieu ch'éteot acore là l'meilleur canal.

Mais d'un buveu comme Edmeond i-feaut bin puqu'cha pou chasser l'démeon. 

"Ceulle feos, je n'peux pos y écapper, mais avant de m'mette au jus d'tomate, j'voudreos pouvoir acore ein feos m'in foute eine pa d'rière l'cravatte".

I-passeot jusse pa d'vant la Halle-aux-Draps, dusque v'neot d's'ouvère les journées brassicoles quançqu'i-a rincontré s'n'amisse Arthur qui li a dit :

"Viens ave mi, aujord'hui, ch'est ichi qu'on picole". 

"On orvient d'chez l'docteur, Edmeond, et te l'sais bin, i-n'in est pos questieon".

Arthur continua s'tintatieon, Fifinne pinsa :

"Pou seûr qu'Arthur ch'est ein démeon, même si te li donnereos l'Beon Dieu sans confessieon"

"Allez, laiche te faire, rien qu'in p'tit verre, eine Brunhehaut ou eine Moinette, cha désaltère"

"Ch'est vrai que cha m'a deonné seo d'rester deux heures assis su m'cayère dins l'salle d'attinte du docteur".

I-s'ortourna su Fifinne et li dit :

"Après tout, l'bière ch'est des vitamines et cha deonne bonne mine. J'ai vu eine feimme de l'rue Perdue, pos pus tard qu'hier, et creos-me, ave ce qu'elle m'a dit te n'deos pos t'in faire, elle a v'nu l'ainnée passée et à toutes les bières elle a goûté, heureus'mint que s'file et s'bieau garcheon i-z'éteot'ent là pou l'orcondure à s'maseon. I-n'a que quinze chintilites pa verre, avé cha te n'risques pos d'caire pa tierre".

Comme i-l'aveot anneonché Edmeond i-a bu des p'tits verres, ch'n'est pos beauqueop quinze chintilites mais quançqu'on fait l'queompte siept ou huit verres cha fait pus d'ein lite !".

Je n'vous raqueonte pos l'état dins l'quel i-est ertourné à s'maseon, dins les rues de no beonne ville de Tournai, i-n'est pos passé inaperchu, Edmeond !

"On peut intierrer s'vie d'garcheon, mi j'ai mis fin à eine vie d'boisseon". 

Tout cha ch'est des promesses d'quervassin, i-va orcommincher ch'est presque seûr et certain ! 

(lexique : les démeons : les démons / ainsin : ainsi / ête d'ertour : être de retour / quançque : lorsque / n'pos t'nir in plache : ne pas tenir en place, être impatient / queurir : courir / là-vas : là-bas / i-ortruèfe (du verbe ortrouver) : il retrouve / les potieaux d'cabaret : les piliers de bar, de comptoir / commincher (ou qu'mincher) : commencer / toudis : toujours / eine cosse : une chose / l'karmesse de sétimpe : la kermesse de septembre / l'quémeinée : la cheminée / l'candelle : la chandelle / pou l'moinse : pour le moins / asteur : maintenant / pa d'vant : devant / ahais : oui /l'capenoul : l'innocent (terme picard surtout utilisé dans le Nord de la France / bin léon : bien loin / définte : défendre / quoisque : qu'est-ce que / l'quémin (ou le qu'min) : le chemin / ortrouver (ou ertrouver) : retrouver / printe : prendre / l'meot : le mot / orchevoir (ou erchevoir) : recevoir / eine séquoi : quelque chose / l'tréo : le trou / faire à s'mote : faire à sa guise, faire à son idée, à sa mode / s'mamère : sa mère / boire Bapaume et ses fossés : vieille expression peu utilisée de nos jours qui signifie "aimer la bière par-dessus tout" / ein quervé : un homme ivre / ichi : ici / acore : encore / amarvoyer quéquein : agacer quelqu'un / l'cayère : la chaise / pétête : peut-être / l'boudaine : la bedaine, le ventre / l'blouque : la boucle / l'mareonne : le pantalon, la culotte / offère : offrir / l'sanche : la chance / l'panche : la panse, le ventre / canter malbrouck à quelqu'un : c'est dire lui dire des choses dans le plus grande indifférence de sa part / fiêter : fêter / chiffler : siffler, ici avaler d'un trait, faire cul sec / l'âche : l'âge / chinq : cinq / l'moneonque : l'oncle / dusque : où / serrer : fermer / orwettier (ou raviser) : regarder / bin puque : bien plus / ceulle feos : cette fois / écapper : échapper / s'in foute eine : s'en mettre une / pa d'rière : derrière / jusse : juste / pou seûr : pour sûr, assurément / laicher : laisser / seo : soif / l'file : la fille / des chintilites : des centilitres / caire pa tierre : tomber par terrre / anneoncher : annoncer / l'queompte : le compte / inaperchu : inaperçu / intierrer : enterrer / ein quervassin : un ivrogne).

S.T. mars 2016.

 

17:13 Écrit par l'Optimiste dans Loisirs | Lien permanent | Commentaires (0) | Tags : tournai, patois, picard |

03/03/2017

Tournai : expressions tournaisiennes (398)

Les orcettes de Fifinne.

I-a ein invireon ein meos, j'vous ai promis d'acore vous deonner des orcettes de Fifinne. In lisant les commintaires parus su mblog et les messaches que j'orchois dins m'boîte mail, j'ai, d'puis bin lommint, ormarqué qu'i-a bramint d'feimmes qui vienne'tent orwettier "Visite Virtuelle de Tournai". Ceulle sémaine, Fifinne nous a préparé ein bieau greos lapin et elle vous apporte l'prouèfe qu'à Tournai on peut aussi l'minger sans preones et sans rogins. Elle l'a surlommé :

L'lapin d'auteomne !

Pou qu'mincher, elle a commindé ein bieau lapin au boucher, pos eine biête qui fait misère, eine qui a jusse l'pieau su les ossieaux et qui n'a pos grand-cosse à pluquer d'zeur ! Vous connissez no Fifinne, s'lapin, ch'est ein greos de l'race des géants flaminds. Elle a, bin seûr, d'mindé au boucher de l'décoper !

Su l'tape de l'cuisine, elle a rassimblé tout c'qu'i-éteot nécessaire pour faire l'plat : l'lapin d'jà décopé, ein beon morcieau d'bure, de l'fareine, deux greos ogneons, du thym, du laurier et du persin, eine boutelle d'trinte-treos chintilites d'bière, de l'Tournay (on est chauvin ou on n'l'est pos !), deux belles carottes, du et du poife et ein guisse d'moutarte forte.

Su eine planque in beos ou bin su eine fuelle d'papier qui sert à imballer l'viante, elle a mis de l'fareine et elle a ainsin infareiné chaque morcieau. Dins eine casserole, elle a fait feonte l'bure (on peut aussi utiliser de l'margarine), puis elle a fait colorer l'lapin in l'ortournant pou que tous les côtés soichent ein peu brunis. Elle a ajouté les lamelles d'ogneons et les carottes décopées in rondelles, l'thym, l'laurier, l'persin (eine sorte d'bouquet garni), elle a assaiseonné ave l'sé et l'poife, mis ein peu d'moutarte su les morcieaux et elle a fait mijoter pindant invireon eine hurette après avoir arrosé ave l'bière. L'lapin i-est à point quançqu'elle l'viante elle se détache bin. Elle a alors passé l'sauce au chinois et elle a porté l'mixture obtenue à ébullitieon in rajoutant ein morcieau d'bure et ein peu d'maïzena ou bin d'fareine pou bin l'lier. Fifinne goûte toudis pour vir si i-n'feaut pos rectifier l'assaisonn'mint. Elle plache les morciaux d'lapin su ein plat, elle nappe avé l'sauce et elle sert cha ave des penn'tières natures, de l'purée, des frites ou bin des croquettes. Elle m'a dit qu'on pouveot aussi accompagner l'plat d'carottes cuites à l'ieau avé ein peu d'chuque ou bin d'eine beonne compote de preones. Ein p'tit consel : Fifinne met toudis deux ou treos cuillères à soupe d'ieau avant l'cuisseon pour que cha n'accroche pos au feond. 

Ch'est ein orpas pou l'diminche quançqu'on a tout l'temps pou l'préparer et surtout pou l'déguster.

Vous allez me d'minder quoisque vous allez boire ave cha ? Bé, eine boutelle de vin rouche (j'vous laiche l'soin de l'queusir) ou tout simplemint eine bière Tournay !

Fifinne, elle nous a aussi préparé ein déssert. I-n'est pos treop difficile à faire, cha prind tout au puque 45 minutes. 

L'crème de riz au coulis d'preones !

Pou quate perseonnes, vous avez b'soin d'septante-chinq grammes d'riz, d'un demi lite d'lait intier, d'un demi bâtonnet d'vanile, d'eine pétite cuiller d'chuque semoule, un p'tit peot d'crème fraîque intière (surtout pos allégée), un blanc d'oué, chint chinquante à deux chints grammes d'preones et du chuque impalpape.

Pou commincher, on passe l'riz sous l'ieau dins eine passette et après on l'fait cuire, à feu doux, sans couvère l'poileon, pindant eine beonne demi-heure dins l'lait bouillant avé l'bâteon d'vanile. Quançque l'riz i-est cuit, on ertire le bâteon d'vanile et on l'verse dins ein plat in y ajoutant le chuque. Je l'veos bin vo lanque elle file d'jà mais on laiche orfroidir et in puque ch'est pos fini !

On met les preones et quate cuillers d'ieau dins eine casserole et on fait cuire à feu doux jusqu'au momint dusque les fruits soichent bin ramollis. On passe l'mixture au chinois et on ormet l'coulis dans l'casserole su l'feu pou l'faire épaissir. I-a ein truc pou raviser si ch'est assez épais, su l'deos d'eine cuiller cha deot glicher comme ein voile. On ajoute l'chuque impalpape et cha aussi on laiche erfroidir (si possipe, à l'abri des galfards). 

On va batte l'crème fraîque et, à part, l'blanc d'oué. Quançque l'blanc i-est consistant, on l'incorpore avé l'crème fraîque dins l'riz qui est d'jà orfroidi. I-reste à étinte pa d'zeur coulis d'preones et à rectifier avé ein peu d'chuque si ch'est nécessaire et si on n'est pos diabétique. 

Edmeond i-s'traîn'reot su s'vinte pou minger ein parel déssert mais i-feaut dire que m'n'heomme ch'est ein sapré galafe et qu'i-aime toutes les chucartes

Si vous aimez les orcettes d'Fifinne vous pouvez me l'faire savoir in laichant ein commintaire, je n'voudreos pos, l'prochaine feos, vous foute l'barpe avé des artiques qui n'veont pos vous plaîre !

(lexique : orcette (ou ercette) : recette / acore : encore / orchevoir (ou erchevoir) : recevoir / bin lommint : bien longtemps / bramint : beaucoup / orwettier (ou raviser) : regarder / ceulle : cette / l'prouèfe : la preuve / les preones : les prunes / les rogins : les raisins / surlommer : surnommer / qu'mincher (ou commincher) : commencer / l'pieau : la peau / les ossieaux : les os / grand-cosse : grand-chose / pluquer : grapiller / d'zeur : dessus / bin seûr : bien sûr / décoper : découper / l'tape : la table / l'bure : le beurre / l'fareine : la farine / l'persin : le persil / du sé : du sel / eine guisse : un petit morceau, un fragment / l'moutarte : la moutarde / eine planque in beos : une planche en bois / l'fuelle (ou fouèle) : une feuille / imballer : emballer / infareiner : enfariner / feonte : fondre / ortourner (ou ertourner) : retourner / soichent : soient / eine hurette : une petite heure / quançque : lorsque / toudis : toujours / vir : voir / placher : placer / les penn'tières : les pommes de terre / l'ieau : l'eau / l'chuque : le sucre / ein orpas : un repas / diminche : dimanche / quoisque : qu'est-ce que / rouche : rouge / queusir : choisir / tout au puque : tout au plus / fraîque : fraîche / ein oué : un oeuf / du chuque impalpape : du sucre glace / commincher (ou qu'mincher) : commencer / eine passette : une passoire / couvère : couvrir / l'poileon : le poêlon / ertirer (ou ortirer) : retirer / l'lanque : la langue, l'expression l'lanque elle file signifie : avoir envie de manger, saliver / dusque : où / raviser (ou orwettier) : regarder / glicher : glisser / ein galfard : un gourmand / batte : battre / étinte : étendre / l'vinte : le ventre / ein sapré galafe : un riche gourmand / les chucartes : les sucreries / foute l'barpe : barber, ennuyer / les artiques : les articles). 

S.T. mars 2017.

11:25 Écrit par l'Optimiste dans Loisirs | Lien permanent | Commentaires (2) | Tags : tournai, patois, picard |

24/02/2017

Tournai : expressions tournaisiennes (397)

Ov'là orvenu l'temps des carnevals !

Ceulle sémaine, pou les carnevals, Edmeond i-a été acater ein feaux-visache et l'tiête d'l'heomme politique qu'i-aveot queusi a fait naîte eine broule dins l'ménache. Queomptez su mi pou vous espliquer quoisqu'i-s'a acore là passé. 

I-aveot décidé qu'pou participer, saim'di, au cortèche à Kain, i-alleot ête afulé tout simplemint in directeur d'Publifin. 

"Fifinne, surtout te n'deos pos t'in faire, cha n'va pos coûter treop tcher, je n'vas pos dépinser des liards pou les vêt'mints et te n'as pos d'raiseon d'ête triste, j'vas seul'mint mette m'costume d'mariache qui m'fait orsanner à ein ministre". 

"A m'mote qu'in l'mettant, te vas ichi avoir l'air fin, te sais bin qu't'as perdu vingt kileos et qu'te flottes d'dins".

"Ch'est de t'féaute, si j'flotte ainsin dins mes mareonnes, ch'est à causse de tous les soucis que te m'deonnes". 

Et ch'est eine nouvelle batale qui v'neot d'commincher, ein conflit, sans ultimatum qui, tout à n'ein queop, i-aveot éclaté.

"T'aveos pourtint toudis dit qu'ceulle ainnée, ch'est l'gille que t'areos fait !"

"Bé justemint, j'n'ai pos foutu d'cacoule, c'jour-là, i-est infin arrivé !".

Fifinne qui a l'cerveau lent et qui a toudis besoin d'eine précisieon, elle n'aveot, acore eine feos, pos du tout compris l'allusieon.

Jusqu'à là, vous l'avez ormarqué, cha orsanneot puteôt à eine guerre de trinchées mais, à c'momint-là, Edmeond ch'est eine véritape beombe qu'i-alleot lachée. 

"J'vas mette des eureos plein les poches de m'jupeon pou mi bin avoir l'air d'ein qui n'vit que pou l'pogneon".

Fifinne elle n'aime pos qu'on touche à les écolomies, elle warde jalous'mint ein p'tit pécule pou asseurer leu fin d'vie. 

L'réactieon elle n'a pos tardé, on l'a intindue berler :

"Holà, comarate, te vas toudis printe des billets d'monopoly comme cha dins les cabarets te n'saras pos finir l'nuit". 

Ch'est à momint-là dusque chez elle, l'franc i-a qu'minché à caire :

"J'comprinds quoisque te vas faire, asteur, te vas osoir, t'es bin seûr, mo bé... queulle affaire !".

"Mi j'pinseos que t'alleos faire l'gille ave les ceusses de Saint-Piat, j'éteos bin leon d'imaginer eine histoire comme cha. A propeos, à vouloir bin jeuer l'rôle du patreon d'Publifin, te n'risques pos aussi d'caire malate saim'di au matin ! Comme d'puis l'début te n'in as jamais minquer eine, on pourreot lir dins l'gazette l'sémaine pochaine : Edmeond, pou l'prumière feos, i-n'éteot pos là, eine heure avant l'départ i-a inveyé ein certificat !".

"T'as tout à fait raiseon, Fifinne, ch'n'est pos fort "éthique" d'orprésinter ein heomme qui s'chucre avé d'l'argint public". 

"Tins, au magasin, l'vindeu i-m'a dit que j'pourreos faire Serge Gainsbourg, que d'ailleurs i-trouveot que j'aveos s'n'allure quançqu'i-m'raviseot à... contre-jour !".

"I-n'a pos tout à fait tort, t'as d'jà comme li les orelles décollées et in puque, ce qu'i-n'sait pos, ch'est qu'ti aussi t'es toudis quervé".

"Mo Dieu, te peux bin rire d'mi, Fifinne, ti, t'es leon d'orsanner à Jane Birkin. Si te viens à Kain avé mi, te pourras tout jusse t'déguiser in Mimi Mathy. Ou bin alors, comme tous les jours te brousses, te n'as qu'à t'attifer in Marie-galousse". 

Les hostilités éteot'ent déclinchées et ch'éteot pos prêt d's'terminer. 

"Attinds, j'vas t'deonner ichi des démisses, te prindras aussi eine boutelle à t'main, ainsin arnicuré d'eine vielle quémisse, ch'est t'rôle pus vrai qu'nature que te moutreras à Kain, te n'devras même pos mette ein feaux visache su t'tiète, i-suffira tout simplemint d'printe t'n'habituel air biête".

On peut dire que cha voleot vraimint bas et mi j'n'aveos jamais intindu cha. 

I-est vrai qu'Fifinne, quançqu'on l'fait bisquer, bin vite s'lanque de vipère elle apparaît mais, pou eine feos, Edmeond i-n's'in est pos ortourné, i-li a dit tout douch'mint, sans s'démeonter :

"L'ceu qui déchire s'nez i-déchire s'visache, ceulle ormarque elle est gratuite !"

"Sache aussi qu'i-veaut mieux printe eine purche qu'eine feimme, l'méd'cine elle passe pus vite !".

I-paraît que ch'est presque tous les jours ainsin mais quançque j'sus à leu maseon, j'active l'frein, pou faire caire l'tinsieon et dévié l'conversatieon. 

"Hureus'mint que pou respecter les traditieons tournisiennes i-a 'cor des des bintes de dévoués, j'ai l'raminvrance des cris et des rires qui retintisseot'ent aux carnevals dins les rues d'no cité. On éteot même obligés d'printe ein parapuie pou s'protéger de l'pluèfe des caneons à confetti. Les infants i-z'aveot'ent l'esquite quançqu'i-veyeot'ent les sinches et les noirs sauvaches du groupe des Déchaînés. On voudreot faire eine confrérie ainsin asteur, on devreot toudis faire bin attintieon, pasque pou ein rien on mécontinte bramint d'associatieons. Aujord'hui, cha n'existe pus l'autodérisieon, on dépose plainte in justice pou ein oui ou pou ein neon. Ch'est vraimint au sièque des p'tits esprits qu'on vit, i-d'a toudis ein pou pinser qu'on s'fout d'li !".

"Dusqu'i-est l'temps des Pierreots et des Colombines, des Cartelettes et des Arlequins, des belles dames in ropes d'crinoline, des Gilles de Saint-Piat et des Pêcheurs Napolitains. J'warde toudis au feond d'm'coeur ce qu'mi j'appelle nos ainnées-bonheur. Te pouveos t'amuser et rire, i-n'aveot jamais quéquein pou t'agonir ".

Mais tout cha n'a pos d'importance pasque cha n'va pos nous impêcher, mes gins, d'faire l'fiête, saim'di après-deîner, dins les rues et su l'plache de Kain".  

(lexique : orvenu : revenu / les carnavals : le carnaval (ce mot est toujours au pluriel en patois) / ceulle : cette / acater : acheter / queusir : choisir / l'broule : la brouille, la mésentente / queompter : compter / quoisque : qu'est-ce que / acore : encore / l'cortèche : le cortège, la cavalcade / afuler : affubler, habiller de manière ridicule, bizarre / tcher : cher, onéreux / les liards : l'argent / orsanner : ressembler / à m'mote : à mon idée, selon moi / ichi : ici / les mareonnes : les pantalons / eine batale : une bataille / commincher (ou qu'mincher) : commencer / tout à n'ein queop : tout à coup / toudis : toujours / foute des cacoules : raconter des mensonges / l'jupeon : ce mot à Tournai désigne le veston / les écolomies : les économies / warder : garder / asseurer : assurer / berler : crier, hurler / comarate : camarade / printe : prendre / dusque : où / caire : tomber / asteur : maintenant / osoir : oser / queulle : quelle / les ceusses : ceux / ête bin leon : être bien loin / jeuer : jouer / minquer : manquer / inveyer : envoyer / orprésinter : représenter / s'chucrer : se sucrer / raviser : regarder / in puque : de plus / quervé : ivre, saoul / avé : avec / jusse : juste / brousser : bouder, avoir l'air renfrogné / attifer : se vêtir mais avec mauvais goût / eine Marie-galousse : une sorcière / des démisses : des vêtements usagés, des habits qu'on ne porte plus / arnicuré : vêtu, attifé / eine quémisse : une chemise / moutrer : montrer / faire bisquer : faire enrager / l'lanque : la langue / ortourné (ou ertourné) : retourné / L'ceu qui déchire s'nez i-déchire s'visache : expression qui signifie : celui qui médit des membres de sa famille fait tort à lui-même / eine purche : une purge, un laxatif / ainsin : ainsi / quançque : lorsque / des bintes : des bandes / avoir l'raminvrance : se rappeler, avoir le souvenir / ein parapuie : un parapluie / l'pluèfe (ou l'plouèfe) : la pluie / avoir l'esquite (ou avoir l'pépète) : avoir peur / les sinches : les singes / bramint : beaucoup / l'sièque : le siècle / de foute de : se moquer / les ropes : les robes / quéquein : quelqu'un / agonir : insulter / après-deîner : après-midi / l'plache : la place).

S.T. février 2017.

16:08 Écrit par l'Optimiste dans Loisirs | Lien permanent | Commentaires (0) | Tags : tournai, patois, picard |