03 janv.
2014

Tournai : expressions tournaisiennes (256)

Prévisieons astrologiques !

Ch'est dev'nu eine mote, in début d'chaque ainnée, dins tous les périodiques, su treos ou quate paches, d'vir s'étaler les prévisieons astrologiques. I-a là des voyants estra-lucides qui vous anneonchent quoisqu'i-va arriver pindant les douze prochains meos d'l'ainnée et on deot attinte du jour de l'an, l'velle, pou constater que mes gins se seont fourré l'deogt dins l'ouel.

Je n'sus pos pus biête qu'eusses in temps normal, adeon, j'ai été acaté eine boule de Crystal.

Cha m'a pris toute eine soirée pou adveiner quoisque l'ainnée alleot nous réserver.

Accrochez-vous bin à vo cayère sineon vous risquez d'caire à tierre car pou tirer des plans su l'comète, vous allez vir que j'sus eine vedette.

J'vas commincher ceul artique pa l'rubrique consacrée à l'politique.

Attindez-vous à savoir (ch'est eine espressieon, ch'est des meots que j'intindeos tous les jours d'Geneviève Tabuis, eine chroniqueusse d'i-a chinquante ans su Radio-Luxembourg), adeon, attindez-vous à savoir qu'on va avoir d'z'électieons, cha s'ra au printemps quançque l'sèfe elle ormeonte dins les bourgeons. In avril, à partir du prumier du meos, on va acore nous printe pou d'riches biec-beos. Vous allez voir, tout c'qu'on va nous faire acroire. L'écolomie va avoir ein nouvieau démarrache, on va vir baisser les chiffes du chômache, on va créer chint mille implois et ceusses qui seont à l'rue i-veont trouver ein toit, on va aurminter les salaires et supprimer l'TVA su l'nécessaire. I-ara des éoliennes dins tous les coins mais elle ne f'reont pos d'bruit pou les visins, on va supprimer l'tasque... et...holà, réveillez-vous... Mo Dieu quoisque vous avez, à m'mote que vous rêvez !

Soyez rasseurés, i-ara toudis des travéaux à Tournai, si ch'éteot l'contraire, avouez que cha vous areot manqué. Si tout va bin, au meos d'janvier, on ara terminé l'rue des Cap'liers et on pourra commincher l'rue d'Courtrai. Chaque feos que l'vint i-va souffler in rafale, nos brafes pompiers i-veont surveiller les toiles de l'cathédrale et quand i-va pleuvoir à séeaux, dins l'rue de l'Madeleine i-ara toudis plein d'ieau. Bin que pou bramint d'gins, l'astrologie n'soiche pos eine science, mi, j'vous anneonche ces évèn'mints ave dix su dix à l'indice de confiance. Pou les chantiers, in 2014, cha va acore ête l'misère, croyez-me, on va acore connaîte... l'galère.

Quand j'li ai posé l'questieon au sujet d'l'argint, là, m'boule elle a fit des beonds ainsin. Tenez-vous bin : vous allez pétête m'printe pour ein loleo mais... j'vous l'asseure,  i-va couler à fleots, pire acore que l'bière aux peompes des bistreots. L'aurmintatieon d'salaire elle va ête générale, pou les minisses et les présidints d'inter-communales, pou les banquiers et les patreons d'grandes sociétés. Quoisque vous dites, vous vous in foutez, ha bé cha, elle est belle l'solidarité ! Les eautes i-veont orchevoir des écapures et on va leu d'minder de s'serrer in peu puque l'cheinture. In c'qui concerne les banques, ch'éteot acore ein peu flou, je n'sais pos vous dire si on va payer pou placher nos sous. L'coût d'la vie i-n'va pos diminué, bin du contraire, un p'tit peu à l'feos tout va ête pus tcher, les fruits, les légueumes et l'carburant, l'pain, l'viante et l'restaurant, feaudra quand même eine feos m'espliquer pourquoi malgré tout cha, l'index i-reste bloqué.

In orwettiant bin m'boule, i-a eine séquoi qui m'inquiète, ch'est à propeos du contenu de m'n'assiette. In 2014, on va faire l'chasse aux greos, cha va ête indécent d'peser pus d'chinquante kileos pasque quand on vit d'puis chinq ans dins eine crisse, i-feaut, à l'feos, savoir faire des sacrifices. Pou maigrir, i-va falloir tertous s'mette à l'ouvrache, cha ara au moinse ein effet bénéfique su l'gaspillache. On va diviser pa deux l'contenu de nos poubelles, comme cha, l'tasque des immondices elle pourra... rester parelle et in ayant l'allure athlétique d'eine fichelle, on va faire faire d'riches écolomies à l'mutuelle.

Au meos d'mars, dins les rues d'Tournai, on va vir arriver des célébrités, à l'rue du Curé Noter-Dame, i-ara des heommes, i-ara des dames,  i-ara Daniel, i-ara Rudy et pétête Wladimir, l'jour que Gérard, s'bar à vins i-va ouvrir. On rincontrera bramint d'ces idoles, et parmi elles, l'bouquet cha s'ra... Carole.

Quand j'ai évoqué l'meot sport, m'boule elle a soudain manquer d'orsort. Feaut dire que d'puis des ainnées dins l'domaine on n'est pos fort gâté.

Le Fotbal Club d'Tournai i-va continuer à jeuer pa d'vant trois ou quate chints pelés, si les joueux i-n'seont pos ein p'tit queop pus dynamiques, j'sus, à peu près seûr, qu'i-n'veont acor perte du public. L'mal i-a l'air chronique et tertous restent apathiques. Quancque j'ai d'mindé à m'boule quoisqu'i-pourreot sauver le club de Tournai, j'ai vu apparaîte ein visache, on areot dit l'ceu d'Roland Duchatelet, mais... j'me sus pétête trompé, j'n'aveos pos mes neunettes su m'nez !

Quand l'Maseon des Sports de l'deminde a été m'sujet, j'ai vu des raclettes, des brouches et des gins in train d'wassinguer. J'ai vu les gars de l'Estudiantes qui n'aveot'ent pos l'air fort à l'aisse, ahais, ch'est au handball qui veule'tent jeuer, i-n'vienne'tent pos dins l'salle de l'plaine pou apprinte à patiner.

Ein seul club tournisien s'ra seûr de n'pos couler : l'C.N.T. et dins s'piscine de l'Orient i-va acore foute l'pépète aux pus grands.

Comme j'éteos ein p'tit queop taquin, j'ai d'mindé à l'boule de m'parler d'Kain, le hall omnisport i-va béteôt ête terminé mais i-n'aveot pus ein club pou y jeuer. Tournai pouveot ête fier et contint d'avoir ein club de basket in Nationale, mais après treos ans, sans orchevoir les sous de l'buvette i-a été obligé d'déclarer forfait général.

A Wodecq, pos bin leon d'Tournai, on va fouiller l'propriété d'Mossieu Rudy Cambier, on va là faire des grands treos pou cacher infin après l'trésor des Timpliers, les savants i-ont d'jà dit qu'on n'alleot pos trouver d'l'ior, d'l'argint ou bin des pierres, mais pétête bin, on peut toudis rêver, l'épée de Roland de Roncevaux, l'Croix du Christ et l'vrai Saint-Suaire et, du queop, niché au mitan de l'régieon des Collines, l'villache i-va seûrmint dev'nir ein héaut lieu d'pélérinache et l'camp d'Rudy Cambier pourreot bin ête trinsformé in ein parc comme chez Walt Disney.

Final'mint, au momint d'l'interroger su no Peont des Treos, l'boule elle a explosé ein mille morcieaux, vous ariez vu, mes amisses, dins l'pièche, l'dallache, du queop je n'sais pos pou qui ch'est ein mauvais présache.

Moralité : feaut pos jeuer l'apprinti-sorcier, tout cha pou vinte du papier, après tout l'avenir de no ville, ch'est l'ceu que décident nos édiles.

(lexique : eine mote : une mode / les paches : les pages / anneoncher : annoncer / attinte : attendre / l'velle : la veille / l'ouel : l'œil / adeon : donc / acaté : acheté / adveiner : deviner / eine cayère : une chaise / caire : tomber / commincher : commencer / ceul : cet / ein artique : un article / des meots : des mots / quançque : quand / l'sèfe : la sève / ormeonter : remonter / prumier : premier / ein biec-beos : un pic-vert mais aussi un niais / acroire : croire / l'écolomie : l'economie / aurminter : augmenter / les visins : les voisins / les tasques : les taxes / toudis : toujours / rue des Cap'liers : rue des Chapeliers / des beonds : des bonds / pétête : peut-être / ein loleo : un innocent / les bistreots : les cafés / des écapures : désigne une étrenne, un pourboire, une toute petite somme / l'cheinture : la ceinture / placher : placer / tcher : cher, onéreux / les légueumes : les légumes / orwettier : regarder / eine séquoi : quelque chose / ein greos : un gros / pasque : parce que / l'ouvrache : l'ouvrage, le travail / au moinse : au moins / eine fichelle : une ficelle / bramint : beaucoup / ein orsort : un ressort / jeuer pa d'vant : jouer devant / ein p'tit queop : un petit coup, un tant soi peu / l'visache : le visage / les neunettes : les lunettes / des brouches : des brosses / wassinguer (ou amasser l'ieau ave ein wassinque : essuyer avec une serpilière / apprinte : apprendre / l'pépète : la peur / béteôt : bientôt / orchevoir : recevoir / des treos : des trous / d'l'ior : de l'or / mes amisses : mes amis / l'pièche : la pièce / l'dallache : le désordre).

S.T. janvier 2014

17:33 Écrit par l'Optimiste dans Loisirs | Lien permanent | Commentaires (0) | Tags : tournai, patois, picard |

Les commentaires sont fermés.